7 gabime që bëjnë shqiptarët kur flasin gjermanisht

Mësimi i gjuhës gjermane nuk është gjithmonë i lehtë. Shumë shqiptarë arrijnë ta kuptojnë
gjuhën shpejt, por kur vjen momenti për të folur, shpesh bëjnë disa gabime të përsëritura.
Lajmi i mirë është se këto gabime janë krejt normale dhe mund të korrigjohen me praktikë.

1. Përkthimi fjalë për fjalë nga gjuha shqipe
   Një nga gabimet më të zakonshme është përkthimi direkt i fjalive nga gjuha shqipe në
   gjermanisht. Struktura e të dyja gjuhëve është e ndryshme, prandaj një fjali që tingëllon
   natyrshëm në shqip mund të tingëllojë e çuditshme në gjermanisht.
   Në vend që të përktheni çdo fjalë, përpiquni të mësoni shprehjet ashtu siç përdoren nga folësit
   vendas.
2. Frika nga gabimet
   Shumë studentë dinë më shumë sesa mendojnë, por nuk flasin sepse kanë frikë të gabojnë. Në
   realitet, gabimet janë pjesë e procesit të të mësuarit. Askush nuk pret që një person që po
   mëson një gjuhë të re të flasë në mënyrë perfekte. Sa më shumë të flisni, aq më shpejt do të
   përparoni.
3. Ngatërrimi i “der”, “die” dhe “das”
   Nyjet janë një sfidë për pothuajse çdo shqiptar që mëson gjermanisht. Shpesh studentët i
   mësojnë fjalët pa nyjen përkatëse dhe më pas e kanë të vështirë t'i përdorin saktë. Prandaj
   është mirë që çdo fjalë e re të mësohet bashkë me nyjen e saj.
4. Përdorimi i gabuar i “kein” dhe “nicht”
   Kjo është një temë që shkakton shumë konfuzion. Shumë persona përdorin “nicht” kur duhet
   “kein”, ose anasjelltas. “Kein“ përdoret për të mohuar emra (Ich habe kein Auto), ndërsa
   “nicht“ përdoret për të mohuar folje, mbiemra ose të gjithë fjalinë (Ich komme nicht). Edhe pse
   në fillim duket e vështirë, me ushtrime dhe shembuj praktikë, dallimi mes tyre bëhet shumë më
   i qartë.
5. Të mos dëgjosh
   Disa studentë fokusohen vetëm te gramatika dhe ushtrimet, por harrojnë të dëgjojnë
   gjermanisht në jetën e përditshme. Filmat, serialet, podkastet dhe videot në gjermanisht
   ndihmojnë shumë për të mësuar shqiptimin dhe gjuhë gjermane në të folur.
6. Mësimi i shumë fjalëve përnjëherë

Shpesh ekziston ideja se sa më shumë fjalë të mësosh në një ditë, aq më shpejt do të
përparosh. Në fakt, cilësia është më e rëndësishme se sasia. Më mirë të mësoni pak fjalë dhe t'i
përdorni në fjali, sesa të mësoni dhjetëra fjalë që i harroni pas disa ditësh.

7. Mungesa e praktikës së të folurit
   Ky është ndoshta gabimi më i madh. Shumë kursantë lexojnë, shkruajnë dhe dëgjojnë
   gjermanisht, por flasin shumë pak. Gjuhët mësohen duke i përdorur. Edhe 10 minuta bisedë në
   ditë mund të bëjnë një ndryshim të madh me kalimin e kohës.
   Nëse e keni gjetur veten në ndonjërin nga këto gabime, mos u shqetësoni. Këto janë sfida që i
   kalojnë pothuajse të gjithë ata që mësojnë gjermanisht. Gjëja më e rëndësishme është të mos
   hiqni dorë dhe të vazhdoni të praktikoni çdo ditë.
   Mos harroni: qëllimi nuk është të flisni gjermanisht në mënyrë perfekte, por të komunikoni dhe
   të përmirësoheni hap pas hapi.